ሶስቱ ሱሰኛ ካድሬዎች


ሶስቱ ሱሰኛ ካድሬዎችና ሌላ፡- በሌላ ቦታና ጊዜ
በአረጀውና በአስቀያሚው “ርዕዮተ አለም” በርጫ ቤት ውስጥ ቅጠላቸው የተራቆተ የጫት እንጨቶች የተበተነ የደመራ ጭራሮ መስለው ተከምረዋል፤ የሞቱ ሲጃራዎች መተርኮሻ ውስጥ በግንባራቸው ተተክለው በአመድ ተቀብረዋል፤ ጭንቅላቱ ላይ የከሰል ፍም እንደ አክሊል የጫነ የሺሻ እቃ በገረባ ተከቦ እንደ ሃውልት ተገትሯል፡፡ ሶስቱ የአሮጌ ዘመን ካድሬዎች የምርቃናቸው ኒርቫና[1] ላይ ደርሰው በተመስጦ ያወራሉ፡፡
አንደኛው ካድሬ፡- በልማት ስራ ጭቃ የጎረሱ የጥፍር ጫፎች ባሉት አመዳም ጣቶቹ ለአብዮት የከረደደ ጸጉሩን እንደ ነጠላ እየቋጨ እንዲህ ሲል ተናገረ፡- “እኛ ለህዝቡ የመረጥነው መንገድ ውሃ አይገቤ[2] መንገድ ነበር፡፡ የድሮ ታሪክ (በተለይ መልካም መልካሙ)፣ አንድነት፣ ኢትዮጵያዊነት፣ አርበኝናትና ፋኖነት የሚባሉ የድሮ ስርአቶችና የስርአቱ ናፋቂዎችን ጎርፍ በጥላቻ ሃውልትና በግምገማ ገትሮ ማቆም የሚያስችል water proof መንገድ፡፡ ምን ያደርጋል “የአህያ ስጋ መሬት አልጋ ሲሉት መሬት አለ” ያ ዲክታተር መንግስቱ እውነቱን ነው፡፡ እኛ ግን በዚችን አገር የፖለቲካ፣ የባህል፣ የሃይማኖት፣ የፍልስፍናና የታሪክ ባዘቶ ውስጥ ቀላቅለው ሊፈትሉን የማንቻል ተራራ አንቀጥቃጭ ነጻ ትውልዶች መሆናችንን ልማታዊ ደራሲና ጋዜጠኛ በታሪክ ይመሰክራል፡፡”
******
ሁለተኛው ካድሬ፡- ከሌባ ጣጡና ከመሀል ጣጡ ስር ተሸብልቃ ካ፟ለች የአዲስ ራዕይ ትንባሆ ጡት የላገውን ጢስ በአፍንጫው እያሶጣ እንዲህ አለ፡- “ህዝቡ ተደስቶ እንዳይኖር የራሱ ጠላት እራሱ ህዝቡ ነው፡፡ ከታላቁ መሪያችን በላይ ያለ አድማጭ ተናጋሪ፣ያለ ተከታይ መሪ፣ያለ ነገ ባለራዕይ እንዲሁም እንደ ሶምሶም በቁም ካሰለፋቸው በሞቱ ያንጋጋቸው እልፍ የሆኑለት ሌላ መሪ በዚች አገር ያለና ይገኝ ይመስል ህዝብ ይለፋል፡፡ ፍቅር የሚባል አብዮት ለክርስቶስም አልበጀው ያተረፈለት መገረፍና መሰቀል ብቻ ነው፡፡ ቆይ ግን ህዝባችን ከጠንካራ መደበቂያው ከኤሊ ድንጋይ ይልቅ ስስና ረጋፊ የርግብ ክንፍ የሚመርጠው ለምድን ነው?”
******
ሶስተኛዋ ካድሬ፡- በቀጭኑ የቱቦ አንጀት አማካኝነት በትንፋሿ ተኮርኩሮ ከሚንተከተከው የሺሻ ሆድ ዕቃ ሳንባ ሙሉ (የስብሰባና የግምገማ ወሬ) ጢስ ስባ እያንበለበለችው በሻከረ የሴቶች ሊግ መሪ ድምጽ ተናገረች፡- “ሴት ልጅ ምን ሲነካት በፍቅር ስም የአንድ ወንድ የደረት ጌጥ ለመሆን ትመርጣለች? ምንስ ልቧን ሲሰውራት በትዳር ስም እስረኛ ለመሆን ጣቷን ለባል ትሰጣለች? ማንስ አቅሏን ሲያስታት በእናትነት ስም የልጅ ሞግዚት ለመሆን ትሞኛለች? ስለምንስ ሴትነቷን ያህል ዲግሪ ታጋይነቷን (ዘሯን) ያህል ታላቅነት ይዛ በትምርትና በስራ ትባክናለች?”፡፡ ይህ ነው የሴቶች እኩልነትና የኢኮኖሚ ተጠቃሚነት ማረጋገጫው፤እንጂማ ሴትን በአደባባይና በየሸንጎው ማመስገን ማይ ያቅተዋል (ታላቁ መሪያችንም ሆነ አቶ ኃይለማሪም ይህ ጠፍቷቸው አልነበረም)፡፡
******
ሱሰኞቹ ካድሬዎች አሮጌዋ ርዕዮተ አለም በርጫ ቤት እንደፈረሹ በምርቃናና ድንዛዜ እንዲህና እንዲያ ሲሉ..ሲሉ..ሲሉ..(፣ሲሰበሰቡና ሲሰበስቡን፣ ሲገማገሙና ሲገመግሙን፣ሲታደሱና ሲቆሽሹ (ማጠብ እደሰነፈች ባልቴት ጋቢ ሲገለብጡ) መሽባቸው፡፡ ሲመሽ እንኳ (የሶስት አስርተ- ዓመት) ምርቃናቸው በቀላል አልሰበር ማለት ለጨብሲ ደግሞ አሶጣቸው፡፡ በጨብሲ ዘመን ጠጥተው በአስቸኳይ አዋጅ ሌሊት ሳይቀር ደንሰውና ተዳርተው ሲያበቁ (በሰው ጩኸት) ምርቃናቸው ተሰብሮ ሳለ ለስካራቸው ንጋት መጣች፡፡ (የተማሩ ከአዲሷ ንጋት ጋር ሲገጥሙ) ሶስቱም ካድሬዎች ግን በፍርሀት እያለከለኩ ከንጋት ሽሽት ሮጠው ከአንዲት አሮጌ ጫት ቤት ፊት ለፊት ቆሙ፡፡
አንደኛው ካድሬ የጫት ቤቷን መስኮት በሃይል እየደበደበ “ባለጫት እባክህ ክፈትና ያደረ ጫትም ቢሆን ስጠን! የዐብይ ዘመን ንጋት እያሳደደን ነው፡፡ ብሎ ጮኸ፡፡”
ሌላ በሌላ ቦታና ጊዜ፡-
አንዱ ጥንብዝ ብሎ ሰክሮ እየተወዛወዘ ሽንቱን ይሸናል፡፡ ሽንቱ አስፋልቱ ላይ መስመር እየሰራ ቁልቁል ተንድርድሮ በማስቲሽ ሰክረው እንደውሻ ተጣጥፈው የተኙ አመዳም የጎዳና ልጆች የመኝታ ካርቶን ስር ይገባል፡፡ ሰካራሙ እተኮለታተፈና ምራቁን እየረጨ “ህዝብ ማለት መንግስት ነው” ሲል ሰማሁት፡፡
የትራፊክ መብራት አቁሟቸው የሚለመኑ ባለመኪኖች፣በወሲብ ንግድ በተሰማሩ ጨቅላ ህጻናት ጭን ገንዘብ ከፍለው የሚደሰቱ ሴሰኞች፣ የቤት ሰራተኛቸውን የስራ ባሪያ ያደረጉ እመቤቶች(የወሲብ ባሪያ ያደረጉ አባወራዎችም)፣ ሹፌር ትራፊክ እዛጋር አለልህ የሚሉ ተሳፋሪዎች፣ ምንዱባንና ደሃ ከቤተክርስቲያን እየደበደቡ የሚያባርሩ ጸሀፍት ፈሪሳውያን እንኳን ሳይቀር “ህዝብ ማለት መንግስት ነው” ሲል ሰማኋቸው፡፡
እንደገናም ሌላ፡-
የመንደራችን ሰዎች ለደገደገች፣ ጧሪና ቀባሪ ላጣች ደራቁቻ ባልቴት ሴት ቤቷ በላዪ ላይ ፈርሶ ሳይገላት ብለው አዋተው ያደሱትን የቀበሌ ቤት የወረዳችን አመራር የእድሳት ፍቃድ የለውም ብሎ ቆሞ አስፈርሶ ቆርቆሮውን አሸክሞ እያሶሰደ “መንግስት ማለት ህዝብ ነው” ሲል ሰማሁት፡፡
የወረዳችን የደንብ አስከባሪ ፖሊስ የአክስቴስ ቦርሳ መንትፎ በአጠገቡ የሚሮጠውን ሌባ “የኔ ስራ ወንጀለኛ መያዝን አይደለም ይኼ የፖሊስ ስራ ነው” በማለት አስመልጦት መንገድ ላይ የሚነግዱ ወጣቶችን በቆመጥ እየዠለጠ እያባረረ “መንግስት ማለት ህዝብ ነው” ሲል ሰማሁት፡፡
ሁለቱም ያሉትን ሰማሁ እንጂ ትረጉሙ ግን ፈጽሞ አልገባኝም፡፡


[1] ኒርቫና (Nirvana) በቡዲዝም እምነት የመጨረሻው የብቃት/የንቃት ደረጃ ሲሆን የምርቃናን የመጨረሻ ደረጃን ለመግለጽ ተጠቀምኩበት
[2] ውሃ አይገቤ፡ water proof የሚለውን የእንግሊዘኛ ቃል ለመተካት የተጠቀምኩበት የራሴ ቃል

አስተያየቶች

አስተያየት ይለጥፉ

ከዚህ ጦማር ታዋቂ ልጥፎች

ከ “ተደምሬያለው!!” ባሻገር

ከ “ተደምሬያለው!!” ባሻገር   የሴት አያቷና የገጠር ነገር የማይሆንላት ጋደኛዬ መንፈሷ ዝቅ ሲልባትና መነቃቃት ሲያሻት ሁልጊዜም ወደ አያቷና ወደ ገጠር ትኖጣለች፡፡ ጋደኛዬ ልክ እንደ በአሉ ግርማ ሁሉ “ከተማ በድንጋይ ክብር የተሞላ ህይወት አልባ መካን ነው” የሚል ከተማ ጠል የሆነ ደረቅ ፍልስፍና አላት፡፡ ሁሌም ሲመቸኝ እንደማደርገው በዚህኛውም የአዲስ ዓመት መባቻ ከእማሆይ ትርሲት የእውቀት ሁዳድ የአመት ድርጎዬን ለመቀበል ጋደኛዬን ተከትዬ ፍቼ መዳረሻ ላይ ከምትገኘው ከውቧ ቅዬ ከደብረ-ጽጌ ተገኝቻለሁ፡፡ በአንዱ አመሻሽ እኔና እማሆይ ትርሲት ከደጅ ተቀምጠን ስለ ሀገራችን ወቅታዊ ሁኔታና ስለ መሪያችን ዶ/ር ዐብይ እያወጋን ባለንበት፤ ጋደኛዬ አለም ድንቡሽቡሹን ልጇን ክረምቱን ለአንደኛ ክፍል ለማዘጋጀት በማሰብ ሒሳብ ስታስጠናው አልፎ አልፎ ድምጿ ከቤት ውስጥ ይሰማናል፡፡ ከግማሽ ሰዓት ያህል በኋላ ጓደኛዬ ውብና ትላልቅ አይኖቻ እንደ ክረምት ወንዝ ደፍርሰው ደፍርሶና ቢጫ ፊቷ በርበሬ መስሎ “የማሪያም ጣቷን” ጥፍር በጥርሷ እየበላች አጠገባችን ተቆናጥራ ቁጭ አለች፡፡ አያቷ ሁኔታዋን ከፊቷ ላይ በመረዳት ከኔ ጋር የጀመሩትን ወሬ እንኳን ሳይጨርሱ “አይዞሽ ትምህርት በችኮላና በእልህ አይሆንም፡፡ ደግሞም ልጅ በራሱ መንገድና ፍጥነት ነገሮችን ፈቅዶ መረዳትና መማር ሲችል ነው ጥሩ፡፡ ትምህርት ከየዕለት ኑሮና የህይወት ጉዞ ጋር ካላገናኙት የሚሸመደድ እንጂ የሚረዱት ሊሆን አይችልም፡፡ ልጅን ሲያስተምሩም ሆነ ሲያስጠኑ እኔን እንዳስተማሩኝ ቆርቆሮ የሁለተኛ ደረጃና የዩንቨርሲቲ መምህራን አይነት በቀቀን ሆኖ መቅረብ ትውልድና ሀገርን ዋጋ ያስከፍላል፡፡ ተማሪዎች ወይም ልጆች የሚማሩት ትምህርት ሙት እንዳይሆንባቸው በመጀመሪያ የትምህርቱን ጽንሰ ...
ተጨማሪ ያንብቡ

ውኃ ይሰማል ጉድ በል አበሻ ውኃ ይሰማል አለች ፈረንጅ

ውኃ ይሰማል ጉድ በል አበሻ ውኃ ይሰማል አለች ፈረንጅ አሸናፊ አበራ ውድ የሸገር ታይምስ ቤተሰቦች እንደምን ሰንብታችኋል? የጥምቀትን በአልን በማሳበብ የጻፍኩትን ” ውኃ ና እግዜር” የሚለውን ጽሁፌን ስደመድም የውኃን ተአምራዊ ተፈጥሮ ለመንገር እንደምመለስ ቃል ገብቼ በነበረው መሰረት ባለቅኔው በአጼ ቴዎድሮስ የምናብ አንደበት ውስጥ “ቃል የእምነት እዳ ነው…”ያለውን አክብሬ እነሆ ተመለስኩ፡፡ ውኃ መሰረታዊ የፊዚክስንም ሆነ የኬሚስትሪን ህግ አይጠብቅም ለምሳሌ ሌሎች ቁሶች ሙቀት ሲነካቸው Heat cause expansion በሚለው የፊዚክስ ህግ መሰረት ሞሎኪውሎቻቸው ይስፋፋሉ ውኃ ግን በተቃራኒው ሙቀት ሲነካው ይኮማተራል ወይም (contract) ያደርጋል በቅዝቃዜ ጊዜ ደግሞ ይስፋፋል፡፡ ከቅዝቃዜ ነጥብ በታች ወይም below freezing point የሌሎች ቁሶች መጠናቸው (density) ሲቀንስ የውኃ ግን ይጨምራል above freezing point ሲሆን መጠኑ (density) ይጨምራል ከቅዝቃዜ ነጥብ በላይ ወይም above freezing point ሲሆን ደግሞ ይቀንሳል፡፡ ውኃ ብቻ የመሬት ስበትን እና ከባቢያዊ ግፊትን ጥሶ በረዣዥም ዛፎች ቅርፊት ውስጥ እያቆራረጠ ሽቅብ እስከ ጫፍ ይወጣል፤ውኃ ብቻ ሲፈልግ ፈሳሽ ሲሻው ጠጣርና ጋዝ በመሆን በተለያ ቅርጽ ይገኛል፡፡ ውኃ ከሌሎች ፈሳሶች በበለጠ ወደ ውስጡ የሚገቡትን ጠጣር ነገሮች በፍጥነት ያሟሟል ሌላም ሌላም፡፡ ውኃ ለምን የተለየ ሆነ የሚለውን ጥያቄ መመለስ የሚችለው እራሱ ውኃ ብቻ ይመስላል ጠያቂው ሳይንስ እንኳን መልሱን አልደረሰበትምና፡፡ የዚህ እንቆቅልሽ ፍቺ ሳይገኝ ተመራማሪዎችን በጥፍር ያቆመ ሌላ ክስተት በደቡብ ምስራክ ኤዠያ ውስጥ ተከሰተ፡፡ ጊዜው እንደ አውሮፓውያኑ አቆጣጠር በ...
ተጨማሪ ያንብቡ

ዶ/ር ዐብይ የህመም ማስታገሻ ወይስ መድሀኒት?

ዶ/ር ዐብይ የህመም ማስታገሻ ወይስ መድሀኒት? ዶ/ር ዐብይ አህመድ የሀገሪቱ ጠቅላይ ሚኒስትር ሳይሆን “የ ኛ ጠቅላይ ሚንስቴራችን” ሆኖ፤ በደረቅ ወንበር ላይ ሳይሆን በልባችን ዙፋን፣ በጥቂቶችን አፍ ውስጥ ሳይሆን በመላው ኢትዮጵያውያን ልብ ውስጥ ከነገሰ ዛሬ 138 ቀናት ተቆጠሩ፡፡ በነዚህ ጥቂት ቀናት ውስጥ ግን አጀብ የሚያሰኙና ህልም የሚመስለ ወርቅ ጊዜያትን አብረንው አሳለፍን፡- ዶ/ር ዐብይ እጁን አንስቶ ከማለባት ቀን ጀምሮ “የድሮ ስርአት ናፋቂ እንዳንባል፣ጠባብ ወይም ደግሞ ትምክተኛ የሚባል ታልጋ እንዳይለጠፍብን፣አሊም በግምገማ እንዳንፈረጅ ፈርተን (ለሆድ ለንጀራ) በአደባባይ መጥራት የተውነውን የምዬን ስም አገሪቷ እያሉ አገራችንን ባስረሱን ፊት ፋኖ ሆኖ ኢትዮጽያና ኢትዮጵያዊነትን አመሳጥሮ ጠርቶት ሁላችን በአደባባይ ኢትዮጵያ ብለን መጮህና እውነተኛውን መቀነቷን በግልጽ ከፍ ማድረግ ቻልን፡፡ አብይ በጥቂት ቀናት ውስጥ የጠፋችብንን ኢትዮጵያዊትን ሰጠን፡፡ ከሁሉ በላይ ፍቅርና አንድነታችንን መለሰልን፡፡ የሙያ ነጻነታቸውን “በልማታዊ ጋዜጠኝነት” ስም ተነጥቀው የካድሬ አፍ ሆነው ሲያደነቁሩን የነበሩ የአገር ውስጥ ሚዲያዎችንና ባለሙያዎችን ከእስራታቸው ፈቶልን፤ ዲሽና ኢሳት እያለን እንኳን የኢትዮጵያ ቴሌቪዥንን አምነንን መመልከት ጀመርን፡፡ አምሳለ ክርስቶሱ ዐብይ ለአገራቸው ከገዥው ፖርቲ የተለየ ሀሳብ ስላለቸው ብቻ እንደ ይሁዳ ተቆጥረው እንደ ቃየል በየሜዳው ሲሳደዱ የነበሩ የተቃዋሚ ፖርቲ አመራርና አባላቶችን ስማቸውን ቀይሮ የኢትዮጰያ ምርጥ ተፎካካሪ አደረጋቸው፡፡ ኢትዮጵያዊ መሆናችንን ብቻ አክብሮ በግለሰብ ደረጃ የታመመውን እየጎበኝ፣ የተሰደደውን ፈልጐ እያመጣ፣ የታሰረውን እያስፈታ፣ ፍርድ የጐደለበትን ፍትህ እየሰጠ፣ የተበደለውን ይ...
ተጨማሪ ያንብቡ